2015年10月31日 星期六

一周劈價實錄:新界東好慘情啫!

on.cc東網專訊

【on.cc東網專訊】 樓市轉勢唔係今日先出現,劈價個案更加已經成為「指定動作」,而且近期仲係一區接一區淪陷。究竟今個星期又有幾慘烈呢?即刻同大家總結一吓。

今個星期,主戰場似乎就喺新界東,沿東鐵線嘅沙田、大埔、粉嶺、上水等都「走唔甩」,以區內指標沙田第一城為例,屋苑44座低層B室,實用面積284方呎, 屬最受捧嘅兩房戶,而且已經是最低入場放盤,但最終都要減到365萬元先有承接,打破全年低位,仲係重返2014年下半年嘅水平添。

除咗東鐵沿線,馬鞍山亦有「驚喜」喎!區內翠擁華庭15座中低層B室,減價逾120萬元後,以628.8萬元沽出,由同區換樓客承接,實用呎價8,220元,呎價低於9,000元,好罕見!估計會係今年嘅低位。

樓價「唔掂」,租金亦受波及,沙田中心過往極受內地學生租客追捧,細單位月租曾經去到1.4萬元左右嘅高位,但近日同屋苑廣寧大廈一個中低層B室,劈租劈到每月9,000元租出,較高位跌租約35.7%,聽到都個心都離一離。

而鰂魚涌太古城兩房則王亦僅以月租1.8萬元租出,低市價8%至10%,較高位更加 跌約40%。至於市區樓方面,紅磡黃埔花園2期4座中高層G室,在「無底價」招標下,市場出價保守,終以約550萬元售出,料為今年最低價;第二日同屋苑同類單位,叫價即由590萬元,減至550萬元,成屋苑入場放盤。

今個星期就同大家round up住咁多先。

沒有留言: