信貸評分：攞A定J好緊要！唔想評分急插有法

on.cc東網專訊

好多人以為借錢只要經過銀行審批就得，但其實你借唔借到錢、貸款利息高定低，通通都關一個英文字母事！咩字母咁巴閉？就係你的信貸評分(Credit Score)攞「A」定攞「J」！掌管呢個信貸評分的環聯，其香港個人客戶業務總監羅瑞(Lawrence)教路，唔想申請借貸個陣自己信貸評分急插查實有計！

●借錢點減低信貸評分急插風險？
每當你向銀行或財務機構申請借貸，相關機構都會要求檢視信貸紀錄，睇下你信貸評分同過去還款情況，但原來每當金融機構查閱信貸紀錄，都會對你的信貸評分造成負面影響。

Lawrence表示，早前他打算向銀行申請轉按，為免多間銀行短時間內查閱信貸紀錄拖低評分，他率先「自查」(自行查閱不影響評分)，然後帶同信貸報告遊走不同銀行問價，當決定好轉按至邊間銀行後，才授權該銀行正式查閱其信貸報告。

Lawrence話，雖然最終只有一間銀行查閱信貸報告，不過都令他的分數跌了40分，由靚仔「A」級跌落「B」級。所以你可以想像，如果同時多間機構查閱你的報告，會令評分急插吧？

●淨係借錢要睇信貸評分？錯！搵工都要睇！
唔單止借錢要睇信貸評分，Lawrence表示，依家搵工都要睇！他指出，由2012至2016年4年間，僱主要求應徵者提供信貸紀錄作篩選之用比例倍增。銀行業同資訊科技業僱主提出呢項要求可以理解，但Lawrence話，近年部分行業如清潔服務業都有呢個要求？點解？「因為例如清潔酒店房間等要進入私人地方，僱主同住客都希望聘請到可靠人選。」

●香港後生仔信貸評分係點？
後生仔理財觀較薄弱，通常被形容為「大花筒」，究竟他們的信貸評分如何？環聯截至去年共載有530萬個信貸紀錄，當中16至17%為18至30歲的年輕人。Lawrence話，58%年輕人表示不清楚自己的信貸評分，僅15%曾檢視過自己的信貸紀錄。至於香港年輕人的評分分布，他表示，85%的年輕人信貸評分為A至C級，8%屬於中等或稍低，而7%則屬於「Thin File」，即沒有足夠信貸紀錄。

●想借平錢應該點部署？
如果已有置業計劃或打算借貸，Lawrence建議，最好在申請貸款前的6至12個月檢視個人信貸紀錄，如果評分良好應好好保持，若評分欠佳則可趁這段時間改善紀錄。他引述2015年的調查顯示，若評分屬於A至C級，私人貸款的實際年利率約為5厘，至於評分較差如J級者，實際年利率則為45%，相差極大！

Lawrence解釋，其實信貸評分受到不同因素影響，包括還款紀錄、信貸紀錄及是否新開立過多信貸帳戶等，由於信貸評分影響個人置業甚至求職，所以他建議，年輕人應要建立健康的信貸紀錄。

更多信貸評分相關新聞：【信貸評分：申請信用卡、按揭、借錢都會睇】
http://bit.ly/2rwlsCK

on.cc東網專訊

環聯(TU)係目前香港唯一嘅消費者信貸資料服務機構，佢哋個信貸資料庫載有530萬個消費者嘅信貸紀錄。簡單而言，當消費者向銀行或財務機構申請信用卡、按揭、借錢時，相關機構都會向環聯查閱申請人嘅信貸紀錄，然後再決定批唔批，同埋釐定息率。

為反映個別信貸狀況，環聯會給予每個人一個信貸評分，如果你個底花晒(如常拖欠卡數等)，所獲得嘅信貸評分就會相對較低，連帶影響借貸申請(如貸息偏高甚至不獲批出)。環聯嘅評分目前分為A至J級(A為最高，J為最低)，評分愈高，代表你嘅信貸紀錄愈好，愈容易借到「平錢」。