【銀紙冷知識】4大謎團你真係識？

on.cc東網專訊

銀紙你日日都用，但其實有好多冷知識你未必知道！金融管理局的小森阿四專欄就解開咗多個銀紙「謎團」，睇下你有冇過以下疑惑？

─ ─ ─ ─ ─ ─
●謎團1：銀紙爛咗或崩咗一個角，仲用唔用得？
唔講唔知，原來損壞咗嘅紙幣係有可能唔被接受做法定貨幣㗎！如果只係崩咗角、污漕咗嘅銀紙仍然用得；但如果覺得唔順眼，最好都係拎返發鈔銀行回收。

一般嚟講，銀行會驗證張銀紙係咪真鈔、損毀面積有冇超過1/4、防偽特徵係咪完整，無以上問題就可以兌返錢。

─ ─ ─ ─ ─ ─
●謎團2：如果將兩張爛咗一半嘅銀紙黐埋做一張，用唔用得？
千祈唔好！咁樣合成銀紙可能會被控告製造偽幣，差人拉你㗎。銀行職員驗鈔時，會檢查埋左右兩邊係咪有完整嘅相同鈔票號碼。

─ ─ ─ ─ ─ ─
●謎團3：究竟香港有幾多張銀紙？
香港銀紙總發行量大約有20幾億張，流通嘅紙幣之中廿蚊紙佔最多張，每100張銀紙就有36張係廿蚊；雖然金牛發行量唔係最多，但以金額計就佔總發行金額嘅47%。

─ ─ ─ ─ ─ ─
●謎團4：除咗3間發鈔銀行外，仲有邊個可以發行紙幣？
你可以望下張10蚊紙睇睇。答案係「香港特別行政區政府」！由2002年開始，香港政府開始發行紫色設計嘅10蚊紙，政府只係發行10蚊紙同所有面值嘅硬幣，而其他面額嘅紙幣由3間發鈔銀行發行。