老婆變身人肉樓契

為咗錢, 曬唔曬搞咁多野呀 ?

蘋果日報

阿爺為遏樓市，賣樓交易差價要徵稅20%。不過道高一尺，魔高一丈，強國人竟然諗到「賣樓先換妻」絕橋避稅。

首先買賣雙方夫妻各自離婚，然後將手上房產撥歸男方；之後賣家男方同買家「前妻」結婚，房產共有；繼而又再離婚，房產歸女方，之後各自與原有妻子再婚。為咗錢又離又結，太太於交易中有如樓契，可以隨時進行「轉名手續」，邊個係老公？睇呢期使唔使買樓啦。
此等荒誕鬧劇，相信只有強國至會發生。好難相信一個女人為咗避稅，甘心睇住老公同第二個女人結婚，萬一個男人換咗老婆帶住層樓唔返嚟，真係偷雞唔到蝕揸米。

根據傳統智慧，好多時災難發生前都有異象。最近離婚數字（因辣招出現）創新高，反映內房由炒家玩晒，一個二個坐底有兩三層樓揸手，難怪美國「60 Minutes」都話，中國將成下一個經濟爆煲國。

阿爺依家一定要重藥打遏，否則泡沫爆破，內房手掌手背都係死，問你仲敢唔敢長揸內房？

Fifi
本欄逢周二、四刊出