FRC公布業績後，股價急挫五成後，隔晚未能止跌再跌三成，市場再度憂慮銀行暴發危機，美股個別發展，道指喺銀行股表現疲弱下，跌逾200點，不過微軟公布業績後，股價做好，帶動科技股向上，納指反彈55點。港股今日係期指結算日，半日變動唔大，但未見承接噚日反彈勢頭，半日窄幅上落，喺250日線(19721點)附近游走。
恒指低開20點，跌幅一度擴大至94點，但期指結算前轉倉活動所影響，有心人托住指數轉倉，半日曾倒升61點，中午報收19733，半日升16點。國指半日則跌12點，報收6641；恒科指則跌32點，報收3839。半日成交進一步縮水至482.89億元，睇怕全日成交額同噚日一樣，過唔到1000億元。
藍籌股半日個別發展，平保(02328)表現強勁，公司公布業績首季盈利增加49%，股價半日升6.1%，藍籌之中表現最好。相反招行(03968)季績差過預期，股價半日表現跟平保剛好相反，跌6.2%，成為表現最差藍籌股。至於ATNJ全線走軟，阿里(09988)公布旗下阿里雲要以減價搶市佔率後，股價今日繼續插水，半日再跌2.4%，盤中一度低見80.8元。望返轉頭，阿里股價已幾乎打回原形，股價已重返公布公司改革重組及計劃分拆嘅水平，口痕友話阿里吹風搞咁大單嘢，一度刺激股價重上紅底，畀咗個機會軟銀靚價減持，跟住股價就如瀡滑梯般拾級而下，散戶言以為真高位追貨，又再中伏被割韭菜，咁嘅情況下，以後阿里發放乜嘢好消息都好，唔會有人再肯落搭。至於美團(03690)、騰訊(00700)則分別跌0.7%及1.6%，京東(09618)跌至歷史低位後，反彈乏力，半日亦跌逾1%。友邦(1299)首季新業務價值升28%，股價半日升1.1%，連同大笨象(00005)半日向上，兩者對恒指帶嚟支持，否則喺ATMJ齊齊仆直下，恒指半日無乜可能仲可以錄得升幅。
港股半日不足500億元成交，反映咗港股跌至二萬水平之下，仍未見有資金肯入場接貨，原因係外資撤離後，一去不回頭。中港經濟已重啟超過一季，但市道復甦不似預期，以本港旅遊業為例，內地訪客多集中低端消費群，參加低價旅行團為主，高消費旅客不復見，過往大手掃貴價貨嘅自由行旅行亦未見影縱。由於內地已不缺奢侈品供應，高端消費旅客可以喺內地尋找心頭好，又或到其他海外地區旅遊消費，都唔再嚟香港掃貨。近期更有大型國際奢侈品集團已將部分品牌地區總部由香港遷往上海，可見香港喺外資眼中，已失去往昔嘅吸引力。實體經濟復甦未如預期，加上國際地緣政治關係緊張，中美角力持續，通通對香港極為不利，試問咁嘅環境之下，港股又點會有運行。恒指已失多條移動平均線，目前喺250日線勉強支撐，一旦再失250日線，睇怕將重返1月低位19400水平，此關再失，將繼續向下尋底。
麥狄文
(徐狄怡‧證監會持牌人)
沒有留言:
張貼留言