美股喺業績期表現反覆，但上周五則窄幅上落靠穩，今早道指期貨喺亞洲時段偏軟，港股上周跌逾300點後，今早繼續偏軟，反覆跌過百點。恒指低開25點，雖然早段曾倒升70點，見20146半日高位，但其後再掉頭向下，半日最多跌170點，見19905半日低位，失守20000大關。半日恒指報收19949，跌125點；國指跌23點，報收6740；恒科指半日倒升8點，報3978。半日成交額只有493.46億元，交投持續淡靜。
藍籌股個別發展，ATMJ只有美團(03690)靠穩，騰訊(00700)跟阿里(09988)半日分別跌1.4%及1.2%；京東(09618)半日跌至去年10月低位138.2元，半日報收139.1元，跌幅收窄至0.4%。大笨象(00005)、友邦(01299)跟港交所(00388)跌0.4至0.9%不等，內銀股亦偏軟，建行(00939)跟工行(01398)齊齊跌逾1%。不過中字股繼續跑贏，中芯(00981)經過上周五回吐後，半日逆市反彈0.2%；中移動(00941)跟中石化(00386)分別升0.2%及0.4%。雖然Tesla已表明要繼續打減價戰，但股價已於上周五喘定，而比亞迪(01211)半日更逆市升4.1%，重上230元水平。
今日表現最好嘅板塊係醫藥及生科股，阿里健康(00241)半日升5.5%，成為表現最好藍籌股。其他生科股，普遍錄得超過2%至接近一成升幅，當中三葉草生物(02197)半日升近一成，表現突出。
港股基本上已明顯轉弱，上周跌穿多條移動平均線後，今日再失20000心理關口，250線19735將成為好友力守防線，而19400-19500水平更不容有失，此水平為1月份低位，若然此關失守，大市進一步向下回試18800支持機會大增。港股仍未能打破成交少，氣氛薄弱嘅困局。暫時未係出手撈貨嘅時候，主要係無新資金入場，港股都係易跌難升，等待成交回升，有資金出手撈貨再跟順風車亦未遲。
麥狄文
(徐狄怡‧證監會持牌人)
沒有留言:
張貼留言