on.cc東網專訊
【on.cc東網專訊】
百物騰貴，小市民亦出奇招應對。當1頓午餐動輒4、50元，葵涌廣場有小食店卻逆市而行，推出13元咖喱魚蛋飯、燒賣飯，小食變身正餐，意外地大受歡迎。
光顧者亦由以往「冇乜錢」的學生哥，演變成今時今日OL及上班族，他們為填飽肚，懶理營養成分，原因無非在通漲逼人的生活下，要愈食愈平。
葵涌廣場每走五步就有魚蛋「可篤」，有辣有唔辣，任君選擇。2樓轉角這間小食店，位於車水馬龍之處，每日午飯和放學時段，光顧者絡繹不絕。42歲的陳老闆陳志榮有甚麼秘技，其實是1個「平」字咖喱魚蛋、燒賣這類小食，以營養價值來說，只屬「劣食級」，變成平價飯，亦不見得升價10倍，只可形容為「騎呢」，惟這個魚蛋飯、燒賣飯，卻在網上熱爆，亦被網友形容為劣食界中代表作。
事實上光顧者由OL上班族、師奶大叔，以至學生哥，人人皆好此飯。「初頭賣埋飯盒嘅時候，6蚊1碗白飯。啲學生哥無乜錢，又要平又要飽。於是佢地就淨係要1碗白飯，加多6蚊1串魚蛋，夾埋都係12蚊。」陳老闆初期只將魚蛋、
燒賣「撈埋1盒」賣給學生，豈料其他客人見狀質問他「點解唔賣畀我」，於是索性推出平價飯，即使近年物價飛升，飯盒也只在今年加價1元，13元就有交易。「每個飯長期都係keep住賺1蚊咋！來貨價加咗我哋先加，成間舖頭嘅毛利都畀個飯拉低哂，只係靠啲小食同糕點補番數。」即使創意爆燈，平絕街頭巷尾，仍不敵大市。
「呢幾年生意差咗好多，可能個個供樓負擔重咗，小食都食少咗。」陳老闆說來不無唏噓。即使自稱「上了岸」的他，仍不敵貴租。「以前每次加租都係幾千蚊，對上1次加咗2萬，依家7萬1個月，嚟緊9月續約，再加就唔做喇！不過次次話唔做，都畀人鬧番轉頭。」陳老闆在此開業10年，結識不少「惡形惡相」的熟客仔，「之前試過停賣平價飯，日日煮汁好辛苦架嘛！啲客鬧我，『你唔賣，我食咩？』。惟有繼續整啦。哈哈！」說罷，一對腰果眼和小酒窩又偷偷跑出來。
每個成功男人背後都有個女人默默支持。老闆娘在年華正茂之時，結識眼前這個「肥仔」，陪伴他走過大笪地，經歷03年沙士，一起篤魚蛋過了半生。「後生嗰陣大家喺百貨公司做同事識嘅，之後一齊去上環大笪地賣魚蛋同糕點，後尾搬去瀝源邨都係我哋兩個一腳踢。」02年大笪地重開，原本做傢俬推廣員的他們決定闖一闖，「嗰時真係白手興家，沙士之後搬去瀝源邨，做咗幾年儲咗啲熟客，商場就話要我哋搬入死角位，我哋唔肯。之後佢話俾返個靚位我哋，我哋都話唔做！」陳老闆有骨氣之餘，還有大無畏的實驗精神。「佢個人好鍾意試新嘢，成日拎啲食物做實驗。」陳太說「肥仔」造糕點時，遇上不發酵的情況，就會跟酵母聊天，「佢都傻傻哋！」陳老闆卻辯解：「要用心機先整到好嘢食架嘛！淨係掛住賺到盡咩！」究竟要有多少的愛，才可容納這個男人古靈精怪的遠大理想？
沒有留言:
張貼留言