年初踩樓市 突3,000萬買舖 蘇民峰洩天機？

蘋果日報

堪輿學家蘇民峰出名投資物業有道，佢今年初先講過香港樓市喺2016年前冇運行，佢會等2016年先出擊，點知轉過頭，佢最近就花3,000萬元買入中環堅道一個千呎地舖。蘇師傅講一套、做一套，唔通突然算到有乜天機？
蘇師傅今年2月提過，香港樓市2016年前都唔會有運行，佢手頭唔少舖位都係2009年前買入，依家會靜待時機，2016年先再出擊。
講係咁講，但土地註冊處最新資料顯示，蘇師傅持有嘅「運峰有限公司」喺4月10日，以3,000萬元買入中環堅道添寶閣地下45號一個地舖。地產代理話，呢個舖建築面積約1,000方呎，呎價3萬元，屬於市價，家陣租緊畀一間足浴按摩店，月租6.5萬元，租金回報率2.6厘。

鍾情中環舖　買多過沽

蘇師傅買入呢個舖位，隔籬有間茶餐廳，翻查資料，都係屬於蘇師傅㗎喎，佢早於2005年以1,238萬元，買入呢個43號地舖，可惜中間夾住幢住宅嘅出入口，冇法打通去用。
查實蘇師傅幾鍾意投資中環舖，喺嗰度仲持有幾個地舖，分佈堅道同些利街等，唔通嗰邊風水真係咁好？佢唯一沽咗嘅只係伊利近街11號地下連閣樓，2005年以880萬元買入，兩年後以1,550萬元沽出，賬面賺670萬元。

同樣有投資物業嘅麥玲玲師傅就話，投資都係睇大環境，未必一定事前算過，依家個市回回哋，遇到靚貨，佢都會入市㗎。

李華華