八達通過大海 銀娛率先「嘟」

蘋果日報

香港人而家揸住八達通過澳門都可以嘟一嘟，事關佢哋過埋大海搵食！八達通即日起同「澳門通」合作推出付款服務，但只限於零售商戶，未能喺交通公具使用。呂志和旗下銀娛（027）嘅兩間賭場酒店，澳門銀河及澳門星際酒店入面嘅餐廳、零售商戶可以率先嘟。

澳門通喺2006年成立，似係香港版八達通，除咗坐公共交通，去超市、餐廳，甚至睇戲都可以嘟，不過唔多遊客會買來用，今次受埋八達通一齊玩，佢哋就可以負責埋八達通喺澳門新商戶嘅日常洽商、營運同埋推廣，擴闊客群，互惠互利。

要留意嘅係，根據八達通嘅發展路線，未來幾個月只會陸續係消費購物層面增加澳門付款服務，唔包括交通拓展，即係暫時大家仲未以可用八達通喺澳門坐車，都係要袋些少散銀穩陣啲。

今次並非八達通首度衝出香港，八達通1997年推出，2006年已經幫荷蘭推出智能卡，2009年仲去埋杜拜與新西蘭。對於經常都會過大海嘅香港人，或者成日來港澳又有八達通嘅強國人，應該係最關事嘅一次。