on.cc東網專訊
內地對外開放金融業唔係得講字，依家真係有例證，內地基金從業員資格考試破天荒增設英文試！關你咩事？呢個英文試，講明港澳地區金融機構嘅高級管理人員都可以參加！
中國證券投資基金業協會最近出公告，下個月開始，外商獨資或合資私募證券投資基金管理人嘅外籍高級管理人員，包括法定代表人、董事長、總經理、副總經等高級管理人員，以及負責投資、研究、交易嘅投資管理人員(包括基金經理)，將可參加英文語種嘅基金從業資格考試。
基金呢行喺內地嘅規模達2.6萬億元人民幣，對住嘅並非一般大眾，而係包括合資格嘅內地企業同富豪呢類大客，不知幾多外資行吼住。現時有超過30間外資行喺內地開設咗全資投資管理業務，超過10間仲已經向中國證券投資基金業協會註冊咗，可以提供私募投資基金。
之但係內地基金從業員資格考試以往只得中文，唔識中文嘅，Sorry，此路不通，搞到啲外資行要周圍鬥搶有限嘅曉中文人才。
不過咁，雖則開設英文考試，但合規/風控負責人仍必須報考中文語種嘅基金從業資格考試。對於自問雙語都掂嘅你，絕對有着數，嗱4月12日已開始接受報名，第一場英文試於5月4日喺北京舉行。你仲等乜？
沒有留言:
張貼留言