全球最快樂國家：銀行堅送錢買樓 葡萄嗎？

畸形的金融界, 銀行唔死都殘 !

on.cc東網專訊

【on.cc東網專訊】 北歐小國丹麥一向被譽為世界上最快樂的國家！點解？該國以優厚社會福利聞名世界，近排「再獻新猷」，就係借錢買樓有息收，原因係丹麥央行目前將存款利率定喺負0.65厘。

丹麥雖然否決用歐元，但一直將貨幣克朗同歐元掛鈎，近年歐元區經濟唔掂，歐元一路碌落嚟，丹麥央行為咗聯繫匯率就爆Seed放水，存款利率早喺2012年就處於零以下，堪稱全球負利率嘅先驅。

現年35歲、任職財務策劃師嘅克里斯滕森(Hans Peter Christensen)2005年買咗依家住間屋，隨住丹麥息口一路跌，份按揭舊年年底嘅利率已經跌到去負0.0562厘，3月底要繳交「負249丹麥克朗」嘅按息，即係銀行畀返約292蚊港紙佢。佢父母仲叫佢裱起張單第日畀啲子孫睇吓。

克里斯滕森見到負利率當然唔執輸，3年前同3個投 資者夾份掃咗10個單位。多人炒，首都哥本哈根嘅住宅單位價格，舊年第4季按年急升14.5%，前年同期升幅只係5.5%。當地銀行界人士話，喺丹麥銀行 存款唔會有息收，萬一息口上返2、3厘，好多用零息炒樓嘅投資者就死得。丹麥央行唔係唔驚，1月就將存息由全球最低嘅負0.75厘，加返去負0.65厘， 但歐央行早排先擴大量寬，丹麥存息真係唔知要負到幾時。

講返轉頭，克生住緊間屋要幾錢呢？答案係170萬克朗，大約199萬港元，喺香港，此乃窮人恩物，真令人羡慕依樣多過銀行貼錢做按揭。