2016年5月29日 星期日

生活通識:報稅限期將至 袋穩6貼士唔使慌

on.cc東網專訊

【on.cc東網專訊】 話說稅務局喺5月3日已發出超過250萬份報稅表,收到綠色信封嘅你記住於1個月內交表,數數手指,報稅月即將進入尾聲,ACCA香港分會稅務委員會主席殷國煒同大家分享多個報稅貼士,袋穩佢哋每年報稅都無有怕啦!

(1)網上報稅可延至7月3日
除咗郵寄稅表外,稅務局近年積極推廣網上報稅,唔單止可以延期1個月(即7月3日前報),查實你登入嘅時候,入面好多基本資料已經預先填妥,話晒香港人啲時間好寶貴,有9萬幾樣嘢要做,上網只需填物業、父母子女免稅額、其他收入等,都省下不少工夫。

(2)如何網上報稅?
如果你係第一次上網報稅,你先要準備稅表上的稅務編號去申請「稅務易通行密碼」,然後於「稅務易」開立個人帳戶。若你有個人數碼證書亦可以登入「稅務易」。

如你大頭蝦忘記稅務編號或通行密碼,甚或未能於報稅表找到稅務編號,可於「稅務易」按下「忘記稅務編號/通行密碼」連結,可從個人電郵收取以上資料。

(3)自僱人士有咩稅務責任?
近期愈來愈多人自己開時裝店、網店,殷國煒提醒各位自僱人士要填寫利得稅嗰部分,記得要「紀律一點,唔好心存僥倖漏報」,同埋至少要keep番7年收入同支出嘅業務紀錄。

(4)如何為父母申請扣除開支?
殷國煒亦指,報稅人不能同時申請扣除長者住宿照顧開支及供養父母免稅額,假如你已為年滿60歲以上的媽媽支付5萬港元的院舍費用,由於供養父母免稅上限為4萬港元,而長者住宿照顧開支扣除上限為8萬港元,在此情況下,申請扣除長者住宿照顧開支會較為有利。

(5)MPF扣稅額達1.8萬港元
好多人唔知原來可以係應課稅入息之中扣去強積金供款,2015至2016年最高可獲扣除額為1.8萬港元,殷國煒提醒,如果你一直都漏咗扣除MPF,可以喺6年內索取,不過當然要提交足夠資料啦!

(6)遲咗報稅會點?
香港有唔少大忙人,殷國煒話遲咗報稅可大可少,最高可以徵收全部欠款嘅3倍,都咪話唔少,唔講唔知原來有一個叫追討欠稅組,稅局可採取司法行動追收欠款,就算你去天涯海角都走唔甩,查實納稅人晨早都知自己要交稅,點解唔乖乖地儲定兩個錢呢?!

沒有留言: