on.cc東網專訊
大嗱嗱1億美元(約7.8億港元)掟過嚟，有個26歲後生仔話唔要就唔要！
話說，4年前有人提出以1億美元收購專賣二手貨品嘅應用程式Carousell，當時26歲嘅公司共同創辦人兼行政總裁郭修瑞話有志將公司發大嚟搞，堅決唔賣盤！依家佢30歲，公司市值飆至5億美元(約39億港元)，證明佢同埋另兩位創辦人兼老友吳承翰及陳翊偉當時決定英明。公司早排仲攞到新增8,500萬美元融資，計劃擴充印尼、菲律賓及台灣業務添。
問起郭修瑞當年做咩可以咁勇，唔攞錢印印腳算？佢話，係學Facebook創辦人朱克伯格，人家早年都推過唔少收購Offer。佢仲話，成日都有人走嚟問價，佢同團隊每每考慮幾個問題：收購嘅公司掂唔掂？依家係咪最啱嘅Timing放手？同埋佢哋應唔應該繼續追夢？沉思完，暫時公司門前都係貼住Not
for Sale！
佢哋網上買賣平台目前上架貨品超過1.4億件，郭修瑞話想做業界龍頭，依家離目標連1%都未到，仲有千千萬萬樣嘢要做。
佢哋公司喺2012年於新加坡創立，同年推出Carousell應用程式，旗號係「影相賣嘢、傾偈買嘢」，聽講佢哋平台會因應不同市場而有當地特色，例如新加坡嗰邊嘅平台內置嘅Chat應用，好似「Can
or not？」及「Wait ah」呢類Singlish(新加坡英語)溝通，亦難唔到佢哋。
沒有留言:
張貼留言