2018年7月26日 星期四

唔講唔知!原來馬化騰係「大灣區之父」

on.cc東網專訊

無論報紙或者電視都成日講「大灣區」,騰訊(00700)CFO辦公室副總經理古兆知周四出席澳洲會計師公會活動時就大爆,大灣區概念原來喺公司主席馬化騰率先提議,嗰陣仲未有國策支持,所以為咗推廣大灣區,騰訊就做埋「搞手」,舊年就搞咗大灣區論壇同「粵港澳區青年營」,今年會再發大嚟搞,包括會舉行大灣區金融論壇,青年營邀請名額亦會由100個擴大到200個。

佢話,騰訊幫大灣區居民研發咗「E證通」,可以喺手機上加入身份證同回鄉證等證件,方便佢地掃碼過關;另外亦推出民生服務平台「粵省事」,無論交稅、考駕駛執照,甚至結婚同離婚預約都可以喺平台上搞掂,但因為三地(中、港、澳)監管要求唔同,所以以上服務,港澳地區居民就無份啦。

佢又講,深圳除咗有騰訊、華為等科研公司,仲有成熟嘅物流系統,包括有順豐(002352.SZ)等公司,喺大灣區內可定位為科研中心,再對接香港嘅金融、人才及貨品,依家騰訊正積極爭取支付錢包小額度貨幣互通及遠程開戶,希望可以打通三地人流、物流、資金流同信息流

話說澳洲會計師公會上月初訪問咗逾350名會員,當中有48%受訪者話,未來5年有意喺大灣區拓展事業或業務,更有超過6成人認為,方便進行跨境支付對灣區發展至關重要。

2 則留言:

JJ先生 提到...

唔好講國內, 全世界現在都係, 咁多代理人, 阿馬生係大老闆, 並不代表他背後沒有大老闆.

可能世界某一角落裡, 一個不起眼的山間風光明睸小鎮, 一戶不起眼的人家, 一個不太起眼的中年人, 就是不同國家裡的大老闆背後, 果個幕後大老闆呢.

Lisa 提到...

乜都有可能 :)