古天后日誌｜大市調整未完成 仍有機繼續回補20200裂口

星島日報

2月14日，大致多雲，初時有一兩陣雨，天氣顯著轉涼，最低氣溫15度，明日溫度會進一步下降。隔晚美股喺公布CPI前做好，三大指數上升，升幅超過1%，至於標指仍守4100水平，目前喺4100-4300之間上落，美股仍然喺高位震盪。美股業績期已步入尾聲，至今大部份美企第四季盈利增長輕微倒退，跟預期稍有落差，但美股卻不跌反升，似乎市場資金仍憧憬下半年有機會進入減息期，願意逢低買進美股，令美股高居不下。即使美股現價已較低位反彈唔少，但標指唔少股份仍較去年高位回落三成至五成，美股只要出現調整，資金仍願意入場。至於今晚布CPI，只要唔係太偏離預期，美股亦未必有太大變化，只係隔晚已升定先，今晚就算CPI啱市場心水，都未必有本事再大升。

至於港股噚日回落至20800水平後反彈，較高位回吐1900點，並回補1月4日上升裂口，只係回補首個裂口後反彈，成交未見配合回升，只有1120億元，反映資金喺現水平未見積極部署，港股仍有機會繼續調整，再回補1月3日再對上一個裂口20200。港股喺1月份升破20000點再上23000水平，平均成交額每日都有1500億以上，令1月有足夠動力再升3000點。但進入2月情況明顯唔同，除咗喺23000水平已無法繼續突破，成交亦開始萎縮，大市步入調整。即使噚日大市回補首個裂口反彈，成交未見明顯上升，即係回調或未完成，未有新資金進場，耐心等候大市繼續回補下個裂口20200，屆時買貨或者可以進取少少。雖然港股重返250日線之上，已成功走出熊市步入牛市，但牛市一期基本係一個較長嘅收集期，大市或喺某區期內上落，今年並非大牛市，表現或較反覆，吼回調低位買貨，亦唔代表可以坐定定，見升至阻力位要識食糊，炒上落方為上策。