騙徒扮富豪 微信搶利是

蘋果日報

內地科網熱到連利是都開始無鈔化，網民今年春節最hit係用騰訊（700）旗下新推嘅「微信紅包」搶利是。親友喺微信聊天群組，發佈一定數額嘅利是，等系統自動拆散成多封，畀群組好友搶拎。
點知有人諗到個發財大計，用內地富豪陳光標個名、同西裝照整咗個ID，喺網上瘋傳會在年三十派2,000萬元人民幣利是，只需加呢個ID為友，並將呢個微信號添加到所在群組即可。

年三十短訊用量激增

聽落荒唐，卻成功呃到唔少網民落叠，結果唔單止冇得搶，呢個ID仲搶埋好多群組入面其他人派嘅利是，網傳數額驚人。有傳媒打電話畀陳光標求證，佢話百分百唔係佢所為，仲建議受騙者報警。

騰訊旗下嘅微信（WeChat）年三十短訊亦強勁，官方公佈發送量係舊年嘅兩倍，高峯期1分鐘有成1,000萬條短訊，都咪話唔誇張。至於邊個城巿最多人用？排第一嘅毫無懸念係北京，其次分別係廣東、浙江、遼寧同江蘇。
喺農曆新年期間，短訊內容有賀年字句，WeChat就會彈啲桔仔同埋馬嘅圖案出嚟，騰訊話今年除夕就出過65億次桔仔，以中國13億人計，平均每人收5個桔仔呀！

李華華