「商品大王」羅傑斯為一個女人閃電來港？！羅傑斯近年喺新加坡定居，噚日竟然專登來港，為一間專賣熊貓金銀幣嘅「民生錢幣」主持開張儀式。無他，羅傑斯同民生錢幣嘅話事人陳淼紅有十年情囉，不過就只係交情。
見到靚女即幫襯
羅傑斯笑言，十年前喺上海一個錢幣交易場識到一位靚女，佢又靚又有活力，好快被佢迷住，仲忍唔住即刻買咗個熊貓金幣，呢位靚女就係陳淼紅，兩人之後就成為朋友。現場見佢稱呼對方為班長，原來佢認為陳淼紅喺錢幣銷售呢方面好似captain咁勁，所以咁稱呼佢。當知道民生噚日搬新舖，羅傑斯二話不說由新加坡飛來港撐場，認真夠義氣。羅傑斯仲要係來去匆匆，前晚到埗，今朝晨早就飛去美國做演講。為咗趕及中午出席開幕禮，佢仲一改每朝做gym嘅習慣，可想而知陳淼紅幾有面。
民生錢幣好闊佬
雖然叫做民生錢幣，但係呢間舖同民生銀行（1988）冇關係，2009年喺佐敦開業，家陣搬去黃竹坑，主要賣熊貓金銀幣，客人要預約先可以上門。賣得金銀幣，佢哋送紀念品都好大手筆，噚日送每位賓客一盒5條香港風光銀條，盛惠2,500大元，全部有羅傑斯簽名。咁厚禮，華華當然冇收，影相算數了。
李華華
沒有留言:
張貼留言