魚缸通：散戶蟹貨重重 無心戀戰

on.cc東網專訊

恒指周五早間創咗年內新低，兼跌穿埋被稱為牛熊分界線的250天線(約29,282點)，散戶都驚驚哋，要觀望住先。

致富證券區域經理陳嘉華(Howard)話，客戶都無心戀戰，事關好多持股都變咗蟹貨，三大蟹貨板塊包括醫藥、內房、汽車，依家都潛緊水，亦即股份現價低過佢哋嘅買入價。

不過也有少部分「好息之徒」(喜歡收息的投資者)，分段逐少逐少買入內銀股，博7月上旬多間內銀除淨 (除淨日當日，股價會向下調整以反映派息因素)，可以賺番少少股息。

Howard指，雖然恒指跌穿咗250天線，但他認為投資者未需過分憂慮，始終今次跌市主要由政策引起，不是基本因素和資金流向有改變，投資者可先觀望一下，待市況明朗化後再作投資部署。