2022年5月11日 星期三

【盤房來料】中港兩地股市缺水 縱有反彈亦消磨鬥志

信報財經新聞

內地公布CPI高開預期,喺物價高漲下,通脹數字亦難免高企,不過A股五一假期前後已有阿爺指導,勸戒投資者要睇遠啲,唔好咁短視,言下之意就係叫啲基金大佬手下留情,唔好博命沽貨,A股沽壓減退,上證指數更力守3000點,喺A股半日升逾1.6%帶動下,港股半日亦彈逾300點,能否重上20000大關,就要睇午後能否再下一城。

恒指低開121點,最多跌159點,見19474半日低位,隨住A股做好,港股亦止跌回升,半日最多升354點,見19988半日高位,暫時受制兩萬點關口。半日恒指報收19971,升337點;國指報收6818,升160點;恒科技插水五日後反彈逾4%,重上4000大關,半日報收4087點,升181點。不過半日成交額只有660.33億元,成交依舊薄弱。

藍籌股個別發展,以內房股表現較弱,中海外(00688)跟華潤置地(01109)半日分別跌4.2%及2.9%,反而噚日急挫嘅碧桂園(02007)則靠穩。科網股反彈,美團(03690)半日升8.2%,表現最醒神,連同騰訊(00700)半日升4.4%,兩股合共為恒指貢獻159點升幅。至於阿里(09888)仍然較落後,半日僅升1.1%,而京東(09618)半日則升3%。有消息指美國總統拜登有意撤銷部份中國產品關稅,一對體品孖寶有資金追捧,安踏(02020)半日升7.1%,李寧(02331)半日亦升逾6%。至於大笨象(00005)半日無起跌,友邦(01299)半日則逆市跌0.4%,內銀股亦唔多精神,建行(00939)跟工行(01398)半日跌少於1%。

吉利(00175)純電動車銷量大增,股價半日升6.5%,但仍不及龍頭比亞迪(01211)半日彈7.4%咁勁,至於理想汽車(02015)首季虧損收窄,半日升逾一成。其他汽車股升幅由超過3%至7%不等。

生科股弱咗幾日,今日終於有下似樣啲反彈,有報道指BioNTech在中國完成復必泰疫苗的II期試驗,復星醫藥(02196)勁升14.7%;科濟藥業(02171)消化系統腫瘤藥研究結果在國際期刊發表,半日勁升10.7%;龍頭藥明生物(02269)半日升近一成,其他生科股半日普遍升3%或以上。

港股經歷噚日大裂口低開高走,短線喺19000-19200點料有不俗支持,尤其係A股力撐下,即使美股走弱,港股亦有機會乘A股升勢反彈靠穩。尤其係現貨由21000點回調至19200水平,牛證街貨重貨區已屠殺得七七八八,大戶飽餐一頓後,暫亦無誘因再將大市狠沽質低。只係中港兩地股市一直缺水,喺未夠成交配合下,港股暫難重演3月中嘅大幅急彈,加上美股走勢反覆,港股即使呢轉再反彈,亦只能寸進,首要條件係先重上二萬大關並守穩,否則短線又係反覆上落,消磨缸邊友嘅鬥志。

麥狄文
(徐狄怡‧證監會持牌人)

沒有留言: