聖誕節呢個普天同慶嘅日子，大笨象滙豐就愁雲慘霧，從事散戶證券業務的滙豐金融服務（亞洲）竟然喺呢個時候傳出逃亡潮，聽聞仲有五成員工跳槽過檔，事緣係滙豐金融下年改佣金制喎。
個人理財部調30人應急
一個月前，滙豐金融仍有百名經紀，華華八到，上星期有超過50人一齊起身過檔中銀國際，當中大部份仲係有經驗嘅，內部運作混亂，客戶唔知邊個係自己嘅客戶經理之餘，落單又慢又出錯。究竟呢班員工係被炒定劈炮？內部人士話，今次滙豐更改合約內容，唔受嘅即係要走，所以先有咁多人一次過過檔。滙豐金融服務的前身是獲多利（Wardley），對於上一輩金融界人士，這名字無人不曉，不少城中富豪都是客戶。據聞，長和系主席李嘉誠都是熟客，有一隊人專門招呼他。
點解班員工會走人？事緣下年1月滙豐更改旗下經紀薪酬制度，由佣金制變成有固定底薪加花紅，唔少經紀變相減薪一半或以上，畀着你都走啦。聽聞，日更嘅股票交易呢啲簡單業務仲頂得順，但係夜更同埋複雜啲嘅期權同期指等衍生工具，就未有人力物力去處理。據聞滙豐已喺個人理財部調30個新人去幫手。
滙豐發言人唔回應係咪有人事變動，但就強調，今次唔係一個裁員行動，日後會按需要請人或者作內部調配。
李華華
沒有留言:
張貼留言