money18.on.cc
東方產經專欄作家Handsome哥：今早(13日)恒指落過28,707點，引來不少投資者開淡倉，誰知午後恒指突破29,000點，最新升29,203點，升逾400點，淡友無端端又輸一仗﹗截至14:30，約有70隻恒指牛仔陣亡被回收，真係冇仇報﹗
議息前夕，大戶睇準騰訊控股(00700)雖然冇咩力水，但在顧忌北水隨時出手之下，亦出咗低位，唔會再大跌得落；加上加息前銀行及地產股有支持，只須落注掃高濠賭股及內銀股，指數即可挾高幾百點，殺淡友一個措手不及。見到現時恒指升逾400點，但下跌股份有逾700隻，無升跌的有逾600隻，上升的僅700多隻，成交僅約800億元，可見氣氛唔係想像中咁好，只係大戶喺內銀同濠賭等權重板塊舞高弄低搵食而已。
如無意外，明早美國聯儲局加息，主席耶倫離任前應該唔會有咩政策啟示性的言論發放，港股明日高開似乎係順理成章，大戶可以順水推舟高位沽貨獲利，袋袋平安過聖誕！
若然上述分析正確，淡倉剛被殺的話，都係忍一忍手少做少錯；如果冇貨喺手，做旁觀者提早放假購物；若有貨，明日應該係一個獲利機會，好好把握吧！
沒有留言:
張貼留言