即使歐美多地疫情仍然嚴峻，就算逼近西方重要節日聖誕節及元旦仍要收緊社交距離限制，美股隔晚仍上升，主要係聯儲局已開始一連兩晚議息會議，市場憧憬聯儲局繼續放水，維持寛鬆貨幣政策，加上新一輪刺激經方案將好快落實，隔晚美股做好，納指再創新高，帶動港股今早高開做好，不過始終未能企穩10日線(26481)。
恒指高開213點，早段升幅曾收窄至111點，見半日低位26318點，其後又見買盤趁低吸納，大市重拾動力，半日恒指最多升302點，見半日高位26510點，但10日線始終未能企穩。半日恒指報收26422點，升215點；國指報收10476點，升77點；恒科技升51點，收報8145點。
藍籌股普遍做好，友邦(01299)升0.7%；滙控(00005)漲1.1%；建行(00939)升0.9%；國壽(02628)走高0.7%；中海油(00883)升1%；但港交所(00388)走高1.3%。而藍籌股以瑞聲(02018)表現最好，有報道指蘋果公司計劃明年上半年，將iPhone產量提升至9600萬部，較今年同期多約三成，同時帶動手機設備股造好。
今日跟手設股表現有得揮嘅係新能源股，再吸引資金炒上，主要係美國嗰邊嘅綠色能源股炒到甩轆，主要係市場憧憬拜登上場後，將會支持新能源產業發展，加上信義玻璃(00868)跟信義光能(00968)齊齊發盈喜，整個板塊今日精神爽利。除咗光伏股之外，風電股亦有資金吸納，金風(02208)也彈高4.3%；中傳動(00658)升1.4%。天能動力(00819)宣布分拆電池業務於科創板上市，半日勁升15.2%，留意18元有阻力，想追貨要諗清楚。
受反壟斷法影響咗幾日嘅科網股龍頭，今日終止跌回升，相反之前表現強勁嘅小米(01810)今日則跌2%，但JATM今日見反彈，可惜反彈力度唔算大，長線投資嘅只有坐定定，而想博短炒，似乎依家唔係咁好炒嘅時候。喺政策未明朗化下，呢幾隻重磅股表現將會較為反覆，一旦有任何消息流出，股價將較大波動。
而被MSCI踢出指數嘅中交建(01800)跟中車(01766)半日跌逾1%，下半場復牌嘅中芯(00981)同樣係被美國重點針對，並受制裁嘅股份，公司表示正核實聯合首席執行官梁孟松辭任意願 。一間公司高級管理層去留，居然係由媒體爆料，再由公司核實消息，畀人感覺公司內部管理有幾混亂，當然有人會想入場博反彈，但阿Man認為呢啲唔係機會，隨時係陷阱，對於呢啲政策風險股，阿Man都係避之則吉。
麥狄文
(徐狄怡‧證監會持牌人)
沒有留言:
張貼留言