星島日報
一場世紀疫潮，真係令人見到好多從無諗過的怪現象，例如前晚紐約期油價格急插，初時見油價插穿10美元，已經覺得好大件事，跟住見到跌到每桶油0.01美元，已經嚇到下巴都掉下來，點知跟住仲出現負數，最後竟然以每桶負37.6美元收市，即係話買油仲有錢收，中環茶友齊齊大歎「一百歲唔死都有新聞聽」呢？
買油仲有錢收，喺金市都會偶然出現，簡單來講就係無存儲油倉的問題。由於產油太多，兩、三日前有新聞話儲油設施開始爆滿，已經埋下今次負油價風暴伏線。本月期油到期，做咗好倉若不沽出平倉，就要收現貨油，你又無儲油倉去接，咁咪要再畀37美元去平倉囉！呢一招打到負油價，將好友夾到好傷。以後做期油好倉都要諗過，唔係輸到零可以走，仲要貼錢平倉先可以走。
油價咁插法相信都夾死不少好友，美國頁岩油商相信都會好傷。喺油市空前動盪下，有新加坡石油大王之稱的林恩強（Lim Oon Kuin）已經出事，他創辦的興隆集團（Hin Leong Trading），上周五申請破產保護，準備重整近40億美元債務。
最近消息話，公司過去幾年其實已經虧損，十個茶壺九個蓋，終於就爆煲，石油大王仲坦然承認自己有責任，願意承擔後果。商品市場係高槓桿生意，好多人贏了成世，一次翻艇就宣告玩完。本來話油價到年底都係20美元，估計有140間美國油公司會執笠，現在玩到咁大，借咗錢畀油公司的銀行更驚，會否更早出現大執笠潮？
期油好友被夾死，以至美國頁岩油商財政告急，兩樣隨時會搞出一些金融暗傷，究竟風暴過後災情如何，稍後就會浮現，現時買石油、航空這類板塊股票，市場需求大幅萎縮，行情瞬息萬變，就好似喺佈滿冰山的海上航行，隨時都會觸礁，絕對不能過勇。
油價大插死得人多，板塊風聲鶴唳，本港上市期油ETF的三星原油期（3175）瀉14.2%，收報3.32元。油服股都係重災區，中石化油服（1033）插7%，收報0.55元；宏華（196）插6.5%，收報0.231元；安東油服（3337）降5%，收報0.485元；中海油服（2883）下滑4%，收報5.83元；海隆（1623）跌2.7%，收報0.355元。
冠德倉儲業務變饀餅
不過，一如任何突發災難都有贏家，油價下插有倉儲不足的技術性因素，下個月期油仍然係20美元，所以油股相對跌幅遠比油價溫和，中資三桶油昨日跌幅介乎2.5至3%，中石化（386）旗下的中石化冠德（934）更逆市上升，收報2.87元。中石化冠德係集團旗下負責運輸的子公司，有碼頭、管道仲有倉儲。
去年集團合併盈利創出歷史新高，一個原因就係多得碼頭同倉儲盈利增長帶動。油市供過於求，存倉空間有價，對公司來說應該係天跌下來的一塊饀餅，作為服務供應商，呢瓣業務就成為百年不見怪市下的贏家。中石化係做下游生意，油價關係比較離身，尤其旗下公司主要提供服務，喺風暴中較遠離風眼，但中石化冠德現時市盈率只有5.5倍，往績息率有近7厘，反映投資者在世紀風波下步步為營，估值不敢太高。
聯地私有化逆市爆升
全球油價慘跌下，內地A股全線向下。上證指數收報2827點，跌0.9%；深成指數收報10506點，降1.08%。恒指低開84點後，跌幅一度擴大至653點，低見23676點，收報23793點，急跌536點，連插兩日；國指亦捱沽，收報9614點，插209點。網上醫療股繼續強勢，平安好醫生（1833）及阿里健康（241）逆市齊創上市新高；平醫高見110.1元，收升2.3%，報107元；阿里健康高見17.46元後倒跌，收降1.6%，報17.08元。聯地宣佈大股東提出以1.92元私有化，股價收報1.9元，大升33%。（陸羽仁）
全文刊於《頭條日報》「金融High Tea」
沒有留言:
張貼留言