運動係時候要有新方向

https://lihkg.com/thread/1437332/page/1

轉個台，之前推咗成粒鐘都無人理，有啲長，希望大家唔會睇得太辛苦。念我打咁多，嘥少少時間睇睇，集思廣益吓

就咁，其實大家都知道政府嘅"計"係一直刺激緊勇武升級，進而想引人割蓆孤立義士，意圖真係好撚明顯。

中計撚尤其2014嗰班一般係會叫你唔好升級，咁就唔怕中計。但好明顯政府另一個"計"係：只要你唔升級，運動就無以為繼，全香港人又中計鳥，而一般中計撚係唔撚知點解唔係好怕中呢個無以為繼嘅"計"。

所以要唔中計，只有一個方法，就係真係做到放核彈都唔割！因為搞掂班前線，淨番唔衝嗰啲政府真係理鳩得你。點解？

回顧一下：

1m 2m遊行最大嘅作用唔係話俾政府知香港人反送中，而係話俾所有人知政府係唔會驚亦唔會理所謂民意；

而612同71就係話你知政府係會驚民意一面倒支持衝，甚至乎衝嘅人數有增無減 —— 前者政府用開頭講嘅"計"就可以tackle；而後者就係靠大追捕，靠嚇鳩你，以防止有更多義士上前線。

好喇，入正題，而家我地好多都係諗緊抗爭要持續有好多集會，好多活動，而每一個都係要話要對準政權，對準五大訴求，簡單講，就係靠單一議題（在此，五大訴求為單一議題）凝聚所有人。呢五大訴求仲要日嗌夜嗌，日睇夜睇，咩人都慣晒啦，其實一早已經深深印喺每人嘅心入面，五大訴求，係俾傳媒睇，而行動嘅內容，唔一定要只圍繞五大訴求，唔一定要每次都係遊行，然後衝擊拘捕散場。

我自己就諗，其實凝聚一班人，係唔係一定要靠單一議題先凝聚得到？更準確嘅應該係話，只有議題，而無人與人之間嘅連結，係好難將人團結埋一齊。

常言道有患難見真情，有生死之交，前線同平時只去遊行嘅同路人又建立咗幾多共患難嘅關係？

再者，天琦都講過，政治就係要將唔支持我地嘅人變成支持自己，而喺而家嘅situation，我會認為唔支持嘅人係分為兩種唔支持，第一種係建制深藍廢老中立撚，第二種係唔支持一直升級嘅同路人。

第一種唔駛多講，大家知道警暴對普羅大眾造成心理衝擊，因而轉化嘅Marginal effect係越來越細(雖然而家對劉細良有唔少聲音，但呢點係無可否認分析得幾好)。

而到今日都仲撐警撐政府嘅，除非你逐個逐個1 on 1同佢傾返幾個禮拜，如果唔係我諗應該難啲轉化到佢地，仲要將佢地剝離同溫層先有機會成為我地嘅同路人，你諗仲有無可能轉化佢地？

第二種就係未有建設好心理嘅同路人，佢地跟唔上前線嘅步伐，開始唔理解前線嘅行為，亦唔明白同五大訴求有咩關係，所以兩邊就越走越遠，亦正中政府下懷。所以我會覺得當務之急係感化呢一班人，instead of不斷衝擊。講真，而家未有天時地利，一個禮拜衝佢一日半日都好夠，又可以keep住個溫度，又唔駛每日比新料黑警同TVB。其他時間可以留俾呢班同路人，而2m就係個target audience ，年齡層可以focus為中年人。做好人和，為天時地利做好準備。

咁究竟要點做？我覺得係要動之以情，甚至用體驗嘅方法去令佢地明白前線for what。尤其喺而家有少少膠著嘅狀態，正正就係最合適嘅時候。

民間記者會絕對係一個好嘅平台，可以加插環節比前線將佢地嘅諗法話比同路人知，當然要保護好自己嘅身份。

文宣方面，除左文字同圖像，video係非常重要，紀錄片形式又好，微電影形式又好，係可以好快make it viral，睇下運動初期關於年青人同父母段三毛片就知。方向未必係長期聚焦警暴，反而係要話俾人知點解升級係唯一出路，喚醒返佢地612同71嘅empathy。

至於遍地開花嘅遊行，我覺得唔好喺前線屌人唔出黎，而前線係可以做多步同後排本身唔識嘅傾多啲點解要上前線，鼓勵佢明白，甚至帶埋佢上去，咁緊係喺唔好喺劍拔弩張嗰陣阻住手足啦，叫佢有咩事就撇先，我覺得對佢嘅心理衝擊會好大。

就算佢最終拒絕，起碼都俾佢睇到前線係有勇有謀，會嘗試理解。

多一個會遊行嘅人效果未必好顯著，但多一個人上前係多好撚多。

或者可能會話點解又係前線去做主動，因為每一個前線都企過後排，都有衝破過心理關口，前線都一定明白同路人唔上嘅原因同難處。唔好以為咁樣得一部分人有進步，前線都一樣有，要進步變得更包容，更君子，唔好日日屌用無咁高成本抗爭嘅同路人，避免落入日本社運太過注重苦行嘅惡循環。

坦白講，我唔係真係有啲咩實質做法，但我信連登會有人才諗到，我始終相信，我地要升級行動，同時都要升級同路人嘅心理。仲有好多想講，睇吓大家點諗先。

分化，割蓆係因為有多過一個人所以先可以分，可以割。

和理非同勇武缺一不可，唔係和理非嘅人同勇武嘅人缺一不可，係和理非嘅行動同勇武嘅行動缺一不可。唔好再標籤勇武同和理非，why not both? 各有各做都唔等於要做死一樣，唔等於要比框框自己。

呢度，只有同路人。When we are one，成為真正手足，有邊個可以分開手足？

不分化，不割蓆。當有一日呢二百萬人都做到，我地一定會贏

光復香港，時代革命